Sariak - Xehetasuna - euskaraba

Gazte Sortzaileak beka-deialdiak kultur-proiektuak euskaraz sortzea du helburu, Gasteizko Udaleko Euskara eta Gazteria zerbitzuek, Arabako Foru Aldundiaren Euskararen Foru Zerbitzuaren laguntzarekin sortutakoa.

DOLUAK. Iker Clavero

Iker Clavero Gasteizko artista eta ekoizlearen bakarkako lehen disko kontzeptuala da. 2025eko azaroan argitaratu zuen, GAZTE SORTZAILEAK bekaren deialdiaren baitan. Honako hau da diskaren lehen aurkezpen publikoa.

Diskak doluaren fase desberdinak eta haien kontraesanak azaltzen ditu abestiz abesti (krisia, ukapena, amorrua, negoziazioa, depresioa eta onarpena). Pop elektroniko intimista eta sentikortasun emozionala uztartzen dituen lan bikaina duzue.

Doluak galeraren ondoren hasten den bidaia da. Ez da bide zuzen bat, ezta ordena jakin batean gainditu beharreko etapa multzo bat ere. 

Aurrera egitea ez da ahaztea. Glaera gure historiaren parte bihurtzea da, harekin bizitzen ikastea eta, pixkanaka, bizitzari berriro lekua egitea. 

Doluaren faseak

Krisia: Dena hausten den unea da. Galerak ordura arte ezagutzen genuen errealitatea aldatzen du, eta nahasmena, beldurra edo ziurgabekeria ager daitezke. 

Ukapena: Badakigu zer gertatu den, baina oraindik ezin dugu guztiz sinetsi. Ukapenak erralitate mingarria pixkanaka barneratzeko denbora ematen digu. 

Amorrua: Gelaren bidegabekeriaren aurrean amorrua agertzen da, geure buruaren, besteen edo egoeraren aurka zuzenduta. Minari ahotsa emateko modu bat da. 

Negoziazioa: Gertatutakoa aldatzeko moduren bat bilatzen dugu: "Eta beste zerbait egin izan banu?" Iraganarekin negoziatzen dugu, beste amaiera bat irudikatuz. 

Depresioa: Galeraren hutsunea agerian geratzen da. Tristura, bakardadea eta zentzurik ezaren sentsazioa ager daitezke, eta minari lekua egitea beharrezkoa bihurtzen da. 

Onarpena: Onartzea ez da ahaztea, baizik eta galera gure errealitatearen parte dela aitortzea eta harekin bizitzen ikastea. 

Ikasturte berria hastearekin batera, Vitoria-Gasteizko Udalak euskara ikasteko prestakuntza-eskaintza aurkeztu du, herritarren profil desberdinei zuzenduta. Guztira, gurasoentzako, 55 urtetik gorakoentzako, atzerritarrentzako eta merkataritzako eta ostalaritzako langileentzako 732 plaza eskainiko dira. Eskolak euskaltegiek emango dituzte Arabako hiriburuko hainbat gunetan, hala nola gizarte-etxeetan, BIZAN sarean eta zenbait ikastetxetan. Ikastaro horietan parte hartu nahi dutenek Herritarren Arretarako Bulegoetan egin ahal izango dute matrikula irailaren 7tik (astelehena) 16ra (asteazkena).

2026-2027 ikasturterako matrikulazio-kanpaina gaur goizean aurkeztu dute Izaskun Arrue Kulturgunean egindako prentsaurrekoan, "Euskara arnasgune bihurtu" lelopean. Bertan izan dira María Nanclares Euskara zinegotzia, Iñaki Gurtubai Berdintasun, Euskara eta Gobernantzako foru-diputatua eta Imanol Miranda euskaltegien ordezkari eta IKAko zuzendaria. 

Nanclaresek Gasteizen euskararen ikaskuntzari dagokionez bizi izan den bilakaera azpimarratu du, izan ere, “80ko hamarkadan, gure hiriko euskaldunen ehunekoa % 3,5ekoa zen eta gaur egun % 30 ingurukoa da. 45 urtean hamar aldiz biderkatu da”.  Era berean, azaldu duenez, “ikastaro horiekin, Udalak euskara ikastea errazten jarraitzen du, eta eguneroko bizitzako profil eta esparru desberdinetara hurbiltzen. Erronka aurrera egiten jarraitzea da, gero eta pertsona gehiagok euskara beren egunerokoan txertatu ahal izan dezaten”. 

Udal-eskaintza

Aurten, aurreko ekitaldietan eskainitako lau ikastaro-modalitateei eutsiko zaie: 
 

1. Gurasoentzako ikastaroak. Familia esparruaren baitako hizkuntzarekin lotutako alderdi praktikoak ikasiko dituzte eta, gainera, haien seme-alaben eskolako ikasketa indartu ahal izango dute. HABEk homologatutako 166 orduko ikastaroak izango dira eta gizarte-etxeetan eskainiko dira, pertsona bakoitzaren etxetik gertu. Gainera, kontziliazioa errazten duten ordutegiak izango dituzte. 160,65 eurokoa da ikasturte osoko matrikula arruntaren prezioa. Matrikula murriztua 127,35 eurokoa da ikasle berrientzat eta aurreko ikasturtean % 80ko asistentzia edo handiagoa izan zutenentzat. Langabetuen kasuan, gainera, % 15eko hobaria gehituko da.
2. 55 urtetik gorakoentzako ikastaroak. Hizkuntza hutsetik ikasten hastea eta eguneroko bizitzan moldatu ahal izateko lehen ezagutzak barneratzea ahalbidetzen du programak. Hamahiru ikastarotik lau BIZAN sareko zentroetan eskainiko dira (zehatzago esanda, hauetan: Abetxuku, San Martin, Txagorritxu eta San Prudentzio). Ikastaroaren kostua 55,60 eurokoa izango da (90 ordu).
3. Jatorri atzerritarra dutenentzako euskarazko ikastaroak (AISA). Ikasleek oinarrizko hiztegia ikasiko dute. Hiru talde eskainiko dira Montehemoso kulturunea, Landatxo gizarte-etxean eta Landazuri kiroldegian. Horren helburua da pertsona horiek, ikastaroa egin ostean, hasierako mailako (A1) taldeetan sartu ahal izatea. Matrikularen prezioa 10,35 eurokoa da hiruhileko bakoitzeko (60 ordu).
4. Merkataritzan eta ostalaritzan lan egiten dutenentzako ikastaroak. Ahoz komunikatzen eta euren establezimendurako informazio idatzia prestatzen ikasiko dute, hala nola errotuluak, eskaintzak eta oharrak, beste batzuen artean. Hasierako maila eta haien eskolatze-prozesua euskaraz egin dutenentzako beste ikastaro bat eskainiko dira. Matrikula 51,35 eurokoa izango da (60 ordu/lauhilekoa). Gainera, gaur egun langabezia-egoeran egonez gero, % 15eko hobaria aplikatu ahal izango da.

Ikastaroak antolatzeaz gain, euskara ikastea sustatzeko laguntza ekonomikoak ere eskaintzen ditu Udalak. Aurten, helburu horretara bideratutako kontu-saila 150.000 eurokoa izango da eta 564 eskaera jaso dira.

Arabako Foru Aldundiaren laguntzak

Bestalde, Arabako Foru Aldundiak 100.000 euro bideratuko ditu ikasturte honetan helduei euskara ikastea errazteko, HABEk homologatutako Arabako eta Trebiñuko enklabeko euskaltegietako matrikularen prezioa murrizteko laguntzen bidez. Laguntzen zenbatekoa, ikastaroaren iraupenaren eta modalitatearen arabera, 60 eta 330 euro artekoa izango da, eta 190 ordu edo gehiagoko autoikaskuntza moduluetarako laguntzak ere jasotzen dira. 

Iñaki Gurtubai Berdintasun, Euskara eta Gobernantzako foru-diputatuak azpimarratu duenez, «Arabako Foru Aldundiak 100.000 euro bideratuko ditu helduei euskara ikastea errazteko. Euskara ikasteko urratsa ematea erabakitzen duenarentzat prezioa oztopo izan ez dadin nahi dugu».

Gurtubaik nabarmendu du, halaber, izapideak ikasleentzat ahalik eta errazenak izatea bilatu dela. Eskaera matrikularekin batera egiten da, eta euskaltegiak zuzenean aplikatzen dio dagokion deskontua matrikularen prezioari. 

Laguntzak 2026an 18 urte betetzen dituzten edo adin nagusikoak diren pertsonei zuzenduta daude, betiere Araban edo Trebiñuko enklabean erroldatuta badaude eta deialdian jasotako mailetako batean matrikulatzen badira. Eskaerak egiteko epea irailaren 30ean amaituko da. 

Marka eta Erronka euskara eta kirola uztartu nahi dituzten eragileen topaketa bat da; Gasteizko Udalak, Arabako Foru Aldundiak eta Arabako Kirol Federazioen Elkarteak (AFDA) bi urtean behin antolatua. Bertan euskarak kirolean duen egoera aztertzea eta aurrerabideak identifikatzea da helburua. Kirol arloan lan egiten duten pertsonak izaten dira gonbidatuak: erakundeetako kirol zerbitzuetako teknikariak, federazioetako kideak, klubetakoak, guraso elkarteetako kirol koordinatzaileak, bai eta kirolariak, entrenatzaileak eta kirol epaileak ere.

Marka eta Erronka 2024

Ander Gebara Alaves taldeko jokalariak bere ibilbide profesionalean euskararekin izan dituen bizipenak azaldu zituen. Onartzen du euskarak pisu ezberdina duela Real Sociedad eta Alaves taldeetan, bigarren horretan ere gero eta presentzia handiagoa badu ere. Jokalari euskaldunen artean beti sortzen da konplizitate bat, talde berean ez badaude ere.

La Blanca atletismo taldetik, Araberri saskibaloi taldetik eta Maeztuko herri kirol taldetik, zeinek bere esperientzia kontatu zuen. Hiru esperientzia ezberdinak dira, testuinguruak ere oso ezberdinak direlako: (a) entrenamendu talde batean hizkuntza-ohiturak aldatzeko saiakera bat, (b) talde guzti-guzietan euskarari sarbidea emateko ahalegina, eta (d) naturaltasunetik hasiera-hasieratik funtzionamendu osoa euskaraz izateko erabaki kontzientea.

Hari horretatik tiraka, taldeka, kirol elkarte bateko entrenamenduetan euskarari leku handiagoa emateko estamentu bakoitzak zer egin dezakeen landu genuen (entrenadoreak, koordinatzaileak, zuzendaritza taldeak…)

Previous Next

 

Topaketaren materiala

• Talde-lanaren emaitza (akta)

 

 

Aurreko edizioak

3. edizioa, 2022

Joseba Beloki txirrindulariak. euskaraz eta kirolaz duen ikuspegia azaldu zuen. Bi arazo ikusten ditu euskararekin: kirolaren globalizazioa (batez ere eliteko kirolean) eta belaunaldi berriek kluben eta federazioen erreleboa ez hartzea.

Taldeka gure etorkizun-ikuspegia landu genuen: euskara eta kirol arloan nahi genituzkeen “titular” eta “mugarriak” irudikatzen saiatu ginen, dinamika baten bidez.

Astebete lehenago kirol-ginkana bat antolatu genuen Andre Mari Zuriaren plazan, Euskaraldia eta Marka eta Erronka topaketa girotzeko. Horren bideoa ere materialen atalean ikusi ahal duzue.

Honako material hauek bildu genituen:

 

• Laburpen-bideoa
• Talde-lanaren emaitza
• Ginkanaren bideoa
• Kartela
• Elkarrizketa Noticias de Álava egunkarian
• Topaketa iruditan

 

2. edizioa, 2018

Bigarren topaketa 2018an izan zen, lehen Euskaraldiarekin batera. Aukera hori baliatu nahi izan genuen ekimena kirol arloan zabaltzeko. Gogoeta egin genuen kirol arloan euskararen erabilera sustatzeko dauden aukera ezberdinez (lantaldeetan, ekintza posiblen katalogo bat sortu zen), eta Euskaraldiaren ekimena kirol arloan zabaltzeko aukerak eta mugak aztertu genituen.

 

• Elkarrizketa Radio Vitorian

 

1. edizioa, 2016

Lehen topaketa 2016an antolatu zen Artium museoan. Garai hartan “euskaragile” hitza erabiltzen zen: bertan bildu genituen pertsonak kirol arloan euskaraz egiteko eta euskaraz eragiteko gogoa nabarmendu nahi zelako. Lehen topaketa horren helburua praktika onak identifikatzea izan zen.

 

• Laburpen-bideoa

Gaur argitaratu da Arabako Lurralde Historikoaren Aldizkari Ofizialean 2026ko sarien deialdia.

Araban euskararen erabilera ikertzen duten lanak sustatzeko eta bultzatzeko sariak dira.

Edozein jakintza alorretik egin daiteke ikerketa.