Berriak - euskaraba

Euskaraldiaren baitan, Arabako kirolarien hamaikakoa aurkeztu dute Gasteizen, AFDA - Arabako Kirol Federazioaren Elkartearen eskutik. AFDAk urteak daramatza euskararen erabilera sustatzeko ahaleginean Arabako Foru Aldundiarekin eta Gasteizko Udalarekin lankidetzan, bai eta oraingoan ere.

Kirolean ere euskaraz egitera gonbidatzen gaituzte Arabako hamaika kirolarik. Hamaika dira, baina beste hainbesteren ordezkaritza txiki bat da. Ekimena funtsezkoa da, beharrezkoa delako kirolean euskara sustatzen jarraitzeko eta bultzadatxo bat behar dutenak animatzeko. Euskaraldian ahobizi ala belarriprest rolekin har daiteke parte, biak dira ezinbestekoak.

Ekimen honekin Euskaraldiaren onurak ikusgarri egin nahi dira, eta Arabako kirol federazioak, kirol klubak, kirolariak, entrenatzailea eta era guztietako kirol eragileak ariketa sozial honetan parte hartzera animatu nahi zaituztete.

Arabako hamaikakoa osatu duten kirolari, entrenatzaile, arduradun eta ordezkariek haien bizipenak eta praktikak partekatu dituzte sare sozialetan AFDAren bidez, eredu moduan, kirolean euskaraz egitea gero eta ohikoago izateko.

Hona Arabako kirlarien hamaikakoa:

*E* URTZI BARANDIARAN – ARABAKO TRIATHLOI FEDERAZIOA

*U* EIDER OLABE - JUDIZMENDI IGERIKETA KLUBA CN

*S* KERMAN PZ DE HEREDIA / SARA JZ DE ABERASTURI - MENDIALDEA HERRI KIROL KLUBA

*K* ITXASO HERNANDEZ / JOSEBA LASA - DI – DA LEGUTIOKO PILOTA ELKARTEA

*A* AIDA MARTINEZ / LEIRE ZAMORA - ARABATXO ELKARTEA – GIMNASIA

*R* KEPA ARRIETA – ARABAKO FUTBOL FEDERAZIOA

*A* ESTELA LARREA – LUZERNA ARABAR ERRIOXA ELKARTEA

*L* HECTOR BORGE – ARABAKO HOCKEY FEDERAZIOA

*D* MIREN LEGIDO – GAZTEDI RUGBY TALDEA

*I* URKO HERRAN – KIROLARI - TRIATHLON

*A* NEFER OLAIZOLA – EHARIALDEA EMAKUMEZKOEN ESKUBALIOA TALDEA

ANDER GUEVARA, ALAVÉSEKO FUTBOLARIA ETA IKER LARRAZABAL PILOTARIA.

Argazkiaz gain, sare sozialetan bideoak ere partekatu dituzte, eta hor lagun izan dira:

ANDER GUEVARA, ALAVESEKO FUTBOLARIA ETA IKER LARRAZABAL PILOTARIA.
 

Gazte Sortzaileak gazteen artean euskarazko sorkuntza sustatzeko beka deialdia da.
 

• Norentzat: 16 eta 35 urte bitarteko gazteak.
• Saria: 4.000 euro eta aholkularitza profesionala.
• Epea: 2025ko uztailaren 15a.

Helburua

Gasteizko Udaleko Euskara eta Gazteria zerbitzuek, Arabako Foru Aldundiaren Euskararen Foru Zerbitzuaren laguntzarekin –administrazio biek partekatzen duten helburua baita– Gazte Sortzaileak beka deialdia sortu du, euskarazko kulturgintza bultzatzeko asmoz. Beka horren helburuak dira:
 

• Gazteen artean euskarazko sorkuntza bultzatzea.
• Gasteizko euskarazko kultura programazioan, besteak beste, eragitea, gazteek gazteentzat sortutako jardueren bidez.
• Gazteek beren sormena garatzeko aukera-guneak izatea.

Arabako Foru Aldundiak berriz ere bat egingo du Euskaraldiarekin, euskararen erabilera sustatu eta hizkuntza-ohiturak aldatzeko ariketa sozialarekin. Laugarren edizio hau 2025eko maiatzaren 15etik 25era ospatuko da, lehen aldiz udaberrian.

Euskaraldiaren helburu nagusiak dira herritarren hizkuntza portaeretan eragitea, euskaraz bizitzeko aukerak areagotzea eta entitateek hizkuntza-praktikak bideratuko dituzten neurriak hartzea. Ariketa kolektibo honen bidez, Arabako Foru Aldundiak ere bere ekarpena egin nahi du euskararen biziberritzearen aldeko mugimenduan.

Foru Aldundiak apirilaren 1ean Euskaraldian izena eman zuen eta ekimenarekin bat egiten duela jakinarazi zuen bere komunikazio kanaletan.

Horrez gain, parte-hartzea hainbat ekimenen bidez gauzatuko da:

• Apirilaren 15ean, Probintzia Plazan ekintza dinamikoak egingo dira: gune ibiltaria, argazki txokoa, izen-ematearen sustapena, eta Euskaraldiaren materialaren banaketa.
• Maiatzaren 15ean, Euskaraldiaren hasiera ospatzeko, eraikin instituzionalak apainduko dira eta ekimenaren presentzia kalean ere ikusgai egingo da.

Langileei eta herritarrei dei egingo zaie ahobizi edo belarriprest roletan parte hartzeko, eta horretarako baliabideak eskainiko dira.

Arabako Foru Aldunditik euskararen erabileran jauzi kolektiboa sustatu nahi dugu, guztion artean euskaraz bizitzeko aukerak ugarituz.

Gaur goizean, Europa Biltzar Jauregian, Arabako Enpresen Foroaren aurtengo lehen edizioa egin da, Eusko Jaurlaritzak, Arabako Foru Aldundiak eta Gasteizko Udalak elkarlanean antolatuta. Bai Euskarari Elkarteak jardunaldiaren zerbitzu teknikoa eskaini du.

Foroan 40 bat enpresa eta eragile sozioekonomiko bildu dira lan munduan euskararen presentzia sustatzeko, hizkuntzen kudeaketaren inguruko praktika onak partekatzeko eta enpresa eta hezkuntza zentroetan praktikak euskaraz egiteko erronkak ezagutzeko.

Ekitaldia Lanabes programaren baitan kokatzen da, Araban euskara lanean sustatzeko 2020tik martxan dagoen ekimen estrategikoaren barruan.

Jardunaldiak hainbat hitzaldi eta dinamika parte-hartzaile izan ditu, besteak beste:
 

• LanHitz eta Gasteizko Merkataritzako diru-laguntzak: Hizkuntza Politika Sailak eta Gasteizko Udalak euskara sustatzeko dituzten laguntzen berri eman dute.
• Euskaraldia 2025: Taupa Mugimenduak aurtengo Euskaraldiaren xehetasunak eta parte hartze bideak azaldu ditu.
• Praktikak euskaraz: errealitatea eta erronkak: Enpresa eta hezkuntza zentroen esperientziak partekatu dira, Egibide, RPK, Laneki eta Oreka IT-ren eskutik.
• Talde dinamika: 'Eta nire enpresan zer?': Bertaratuek beren erakundeetan euskararen presentzia areagotzeko erronkak eta aurrerapausoak identifikatu dituzte.

Foroaren baitan, euskarazko praktiken mapa osatzeko prozesua ere abiatu da, Arabako enpresen inguruko informazio baliagarria bilduz.

Jardunaldian izandako parte-hartze aktiboak erakutsi du enpresek euskararen presentzia sendotzeko duten interesa, eta esperientzien trukeak eta proposamen berriek ekarpen aberatsa egin dute.

Arabako Enpresen Foroaren hurrengo edizioa 2025eko irailaren 23an egingo da, Europa Biltzar Jauregian.
 

Ikusi foroaren saioa osorik

Arabako Kirol Federazioen Elkarteak (AFDA) jakinarazi du entitateak Euskaraldiaren 4. edizioan parte hartzea erabaki duela eta Kirolean euskararen erabilera sustatzeko aktiboki parte hartzeko konpromisoa hartu duela. 2025eko maiatzaren 15etatik 25era ospatuko da Euskaraldia. 

Halaber, parte hartzera animatzeko deia egin du. 

Kanpezuko Mendialdea IPIn, ikastetxearen eta euskararen memoria kolektiboa biltzen ari dira transmisioa hauspotzeko, eta horrekin batera, euskararen bilakaera modu erakargarrian ezagutzera emateko. Belaunaldi berriei euskararen historia hurbila transmititzeko egitasmoa da. Sarri, belaunaldi batetik bestera ez da pasatzen egindako ahalegina.

Horretarako, talde eragile bat sortu zen, eta zenbait taldeen solasaldien bitartez informazioa bildu eta kudeatu da. Prozesu horren lehen emaitza bideo bat da, eta, bertan, garai bateko eta egungo familiak, ikasleak eta irakasleak dira protagonistak.