Knörr beken laugarren edizioa euskararen inguruan ikertzeko ikasle bila - euskaraba
Mikel Gartziarenak, 2022ko bekaren irabazleetako batek, "Haur eta Lehen Hezkuntzako etorkizuneko irakasleen sinesmenak eta hizkuntza-jarrerak: euskararen egoera eta erronkak Arabako hezkuntza eleanitzaren testuinguruan" lana aurkeztu du.
Arabako Foru Aldundiak eta Euskal Herriko Unibertsitateak laugarren aldiz jarri dituzte abian Henrike Knörr bekak, euskararen erabilera helburu duten ikerlanak bultzatzeko eta sustatzeko, Arabako Lurralde Historikoan zentratuta. Jone Berriozabal Berdintasun, Euskara eta Gobernantza diputatuak nabarmendu duenez, "pozgarria da ikustea orain arte emandako lau bekak gure lurraldean euskararen ezagutza aberasten duten lau proiektu interesgarri bihurtu direla".
Foru ordezkariarekin batera izan dira Garikoitz Knörr, Henrikeren semea, Victor Moreno, Euskal Herriko Unibertsitateko Kultura zuzendaria, eta Mikel Gartziarena, 2022ko edizioko sarituetako bat. "Dakizuenez, foru erakundeak urteak daramatza euskal hiztunak eta euskaldunen sareak aktibatzen eta Lurraldean euskaraz bizitzeko aukerak bermatzeko baldintzak sortzen lagunduko duten politikak ezartzen. Helburu hori lortzeko funtsezkoa da prozesuari berari buruzko ikerketa bultzatzea eta, horregatik, EHUrekin elkarlanean jarraitzen dugu, hizkuntza-ikerketa azpimarratzen duten sariak antolatuz, hau da, euskararen erabilerari buruzko ikerketa-lan monografikoak eta master amaierako eta gradu amaierako lanen proiektuak sustatuz, bertatik eta Arabatik ", azaldu du Berriozabalek.
"Baina erronka eraikitzailea izateaz gain, Henrike Knörr ikerketa-sariak urtez urte egingo diogun omenaldi xumea ere izan nahi du. Guretzat eta niretzat bereziki, oso pozgarria da gaur ere Henrike Knörren omenezko ekitaldi bat egiteko aukera izatea. Euskara babesteaz gain, sari hauek omenaldi bat ere badute, lehen esan bezala, EHUren Gasteizko Letren Fakultateko katedraduna izan zenaren omenez", gaineratu du.
Gehienez 2.000 euroko dotazioa duten bi sari horiek eskuratzeko eskabideak aurkezteko epea 2024ko urriaren 16an amaituko da. Proposamenak deialdian agertzen diren irizpideen arabera baloratu eta puntuatuko dira (proiektuaren xedea eta interesa, Araban euskararen erabilera normalizatzeko egiten duten ekarpena, ebaluazio orokorra, garapen-maila, bideragarritasuna, curriculum vitaea eta espediente akademikoa eta masterreko azken lana).
Hain zuzen ere, 2022an bekaren irabazleetako batek, Mikel Gartziarenak, bere ikerlana aurkezteko aukera izan du gaur: "Hizkuntz sinesmenak eta haur eta lehen hezkuntzako irakasleen jarrerak: euskararen egoera eta erronkak Arabako hezkuntza eleanitzaren testuinguruan".